إبداعات الشباب *( الوحدة )*

الخميس 15 نوفمبر 2018 04:25 م
إبداعات الشباب *( الوحدة )*
إبداعات الشباب *( الوحدة )*
الشاعرة سما الكردى
شعر - سما الكردى طالبة بالمرحلة الثانوية

الوحدة بيبان

بقيت تعبان

من نفسك

ومن التفكير

وبتسأل روحك

أنا لسه بخير

بضحك للغير

وانشر سعادة

ولاالكآبة اثرت فيا

مش هكدب عليك

خسرت كل حاجه

وكسبتها هى

 

بقيت غريب عنك

ومتشبهلكش

بتداوى جروحك

بجروح تانيه

وبتدفن روحك

جوه اليأس

والأمل المدفون

جواك

ملعونة الأوقات

سيباك

بتضيع وقتك

وبتفضل..عايش

عالذكرى ووجعك بس

وبتضحك دايماً

تستغرب

ازاى الزيف ف الضحكة اتحس

غدر الناس علمك الحزن

الوحدة ولا الناس ؟

قلبك طريق منداس

مشيت فيه بهمومك

ومشيوا فيه بهمومهم

اتلون قلبكك بلونك ولا بلونهم !!

بتخاف منهم ف تشبهم

وتتصرف زيهم بالملى

وتعاتب نفسك من جواك

مين بقى فى الأخر لسه معاك

مين ساب نفسه وفكر فيك

مين كان جمبك وقت الجد

دورت كتير ومشوفتش حد

الناس متاهات بتتوه فيهم

وبنسرح ف طريقنا معاهم

والحيطه السد اما نشوفها

بنفوق وبنرجع ننساهم

زيهم زى الرصاص

اما تضغط عالزناد

طلقه واحده ترد فيك

فجأه قلبك وجعه زاد

ابعد عنهم انساهم

هتخرج منها برده وحيد

فعديها من غير ما تتأثر

ولا تحزن اكيد بعدهم احسن

عشت ناسيك فكر فيك

وازرع حياه جواك

حب نفسك عيش لنفسك

الحياه مستنياك

واتعلم م اللى فات

الخلاصة حبهم

بس افتكر

ان حبك مره مات