قصيدة / احضنوها " الجزء الأول "

الخميس 15 نوفمبر 2018 04:28 م
قصيدة / احضنوها
قصيدة / احضنوها " الجزء الأول "
الشاعر مصطفى فريد
شعر - مصطفى فريد

 

من كِتاب مؤتمر "كُتاب ضد الإرهاب"

 

احضنوها وكونوا ليها من قلوبكم مخلصين

احضنوا الطيبه اللى فيها حضنها هو اليقين

واللى براه النهارده مش هيلقى له معين

سنين وساكنين قلب جوفها رغم فينا كدابين

عايشين على دم الغلابه قلوب ديابه ومفسدين

حلمهم تدمير حياتها بإيد شوية مأجورين

يلعنوها كل لحظه وهما بيها مستورين

ياكلوا فيها ويشربوها ويبيعوها المجرمين

اللى مايستهلوا خيرها خونه رسمى وسفاحين

الكنائس فجروها بدم بارد من يومين

والدموع الغاليه سالت نار على الخد الحزين

قطفوا عمر الورد ضاعت كل تحويش السنين

راح اخويا وابنى بدرى شهدا بإيدين ملعونين

مجردين م الإنسانية عطاشا دم ومسعورين

انتوا ليه عايزين خرابها إنتوا اصلا تبقوا مين

الإيمان عاشق ترابها والملايكة مؤيدين

والكنايس والجوامع انتوا منها مرفوضين

والتوراة ماقلتش تقتل يبقى دينكم أى دين

توصفوا العايز يصونها بأنهم متخلفين

واما ايد تتمد تبنى يحبطوها المحبطين

واما تتسرسب دموعها تكونوا اول شمتانين

فى عرف مين طبع الشماته انكتب وفى أى دين

اللى مش عاجبه عيشتها يسيبها احناالكسبانين

احنا شارينها بحياتنا بغيرها نبقى عريانين

الوطن مش لقمة تيجى بالشحاتة او بدين.

الوطن يبنوه شبابه ايدين ولاده المخلصين

مش شوية ارزقيه مرضى شهرة وأفاقين